İNDONEZİYA ARAŞDIRMALAR MƏRKƏZİ
İndoneziya Araşdırmalar Mərkəzi (İAM) 2007-ci ildə Beynəlxalq münasibətlər və idarəetmə fakültəsində İndoneziyaşünaslıq ixtisası açıldıqdan sonra 2010-cu ildə Azərbaycan Dillər Universiteti və İndoneziya Respublikasının İrandakı səfirliyi arasında qarşılıqlı razılaşma əsasında yaradılmışdır. İAM İndoneziya səfirliyinin hədiyyə etdiyi kompyuterlər və İndoneziya dilinin tədrisi üçün digər texniki vasitələr, zəruri avadanlıq və tədris vəsaitləri ilə təchiz edilmişdir. Mərkəzin İndoneziya ilə bağlı zəngin kitabxanası vardır.
2011-ci ildə Azərbaycanda İndoneziya Respublikasının səfirliyi açıldığı vaxtdan İAM bu ölkənin universitetləri ilə daha sıx əməkdaşlıq edir. İAM-in azərbaycanlı və indoneziyalı alimlər, müəllimlər, tələbələr və ziyalıları arasında birgə fəalliyyəti mühüm əməkdaşlıq körpüsünə çevirilməyə istiqamətlənmişdir.
İAM İndoneziya mədəniyyətini təbliğ etmək üçün vaxtaşırı kütləvi tədbirlər təşkil edir. Mərkəzdə anqklunq musiqi aləti və rəqs üzrə dərnəklər fəaliyyət göstərir. Bundan əlavə, İndoneziya Səfirliyinin nümayəndələri, indoneziyalı ziyalılar və İndoneziya diasporunun üzvləri vaxtaşırı mərkəzə baş çəkir, İndoneziyaşünaslıq ixtisasının tələbələri ilə görüşür və məruzələrlə çıxış edirlər.
İAM İndoneziya hökumətinin təklif etdiyi müxtəlif təqaüd proqramları vasitəsilə Azərbaycan Dillər Universitetinin tələbələrini İndoneziyanın nüfuzlu universitet və mədəniyyət mərkəzlərində təcrübə keçmək, təhsil almaq və tədqiqat aparmaq üçün müxtəlif təqaüd proqramlarına cəlb edir. Mərkəz fəaliyyətə başladığı vaxtdan 50-dən artıq tələbə və məzunun bu proqramlarda iştirakına şərait yaratmışdır.
İndoneziya Araşdırmalar Mərkəzi yalnız Azərbaycan Dillər Universitetinin əməkdaşları və tələbələri üçün deyil, bütün ölkə vətəndaşları üçün İndoneziya üzrə məlumat mərkəzi funksiyasını yerinə yetirir. Maraqlananlar burada Mərkəzin informasiya resurslarından, dil hazırlığı, tərcümə və İndoneziyada təhsil haqqında məlumat xidmətlərindən istifadə edə bilər.
Hədəflər
- İndoneziya dili və mədəniyyətinin öyrənilməsi və tədqiqi sahəsində tanınmış bir mərkəzə çevrilmək.
- Azərbaycanlı və indoneziyalı alimlər və tələbələr arasında əlaqələri genişləndirmək.
Strateji baxışlar
- İndoneziya dili və mədəniyyətini təbliğ etmək.
- Azərbaycanda indoneziyaşünaslığı inkişaf etdirmək.
- İndoneziya dilini mükəmməl bilən kadrlar yetişdirmək.
- İki ölkə arasında münasibətləri möhkəmləndirmək məqsədilə müxtəlif tədbir və təqdimatlar təşkil etmək.
İndoneziyada təhsil almaq üçün təklif olunan təqaüd proqramları
- İndoneziya incəsənəti və mədəniyyəti proqramı (müddəti – 3 ay)
- Darmasiswa proqramı (müddəti – 1 il)
- Magistratura üzrə təqaüd proqramı (müddəti – 3 il)
İndoneziya Araşdırmalar Mərkəzinin kitabxanasına üzv olmaq üçün tələb olunan sənədlər:
- şəxsiyyət vəsiqəsinin surəti
- 1 ədəd fotoşəkil
İndoneziya Araşdırmalar Mərkəzinin müdiri
Laura Həbib qızı Zərbəliyeva
Tel: (+99412) 441-22-78 (daxili nömrə: 156)
Ünvan: R.Behbudov küç., 134, Bakı, Azərbaycan, ADU II mərtəbə
E-mail: [email protected]
Facebook səhifəsi: https://www.facebook.com/cis.aul
İAM-in 2024 – 2025-ci il üzrə fəaliyyəti
İndoneziya Araşdırmalar Mərkəzi aşağıdakıları yerinə yetirmişdir.
· İndoneziya və Malayziyada müxtəlif proqramlarda iştirak etmiş tələbə və məzunların bu proqramlar haqqında təqdimatlarını təşkil etmişdir.
· ADU-nun BMR fakültəsinin 5 tələbəsinin Mərkəzdə istehsalat təcrübəsi keçməsi üçün şərait yaratmışdır.
· 3 oktyabr 2024-cü il tarixində İndoneziya Araşdırmalar Mərkəzində Sunan Kalicaqa Coqcakarta Dövlət İslam Universitinin (UIN) əməkdaşları (Humanitar elmlər fakültəsinin tədris işləri üzrə dekan müavini Dr.Ubaidillah, İslam mədəniyyəti və tarixi ixtisas proqramının rəhbəri Risvinarno və katibi Fatiyah) ilə görüş keçirilmişdir.
· 22 may 2025-ci tarixində İndoneziya Araşdırmalar Mərkəzində İndoneziya Səfirliyinin Media, sosial və mədəniyyət məsələləri üzrə şöbəsinin müdiri Vanda Vidya ilə görüş keçirilmişdir.
· İndoneziya mətbuatında İndoneziya dilində çap olunmuş Azərbaycan obrazını yaradan məqalələri toplamış və Azərbaycan dilinə tərcümə etmişdir (“Azərbaycanşünaslıq” elmi mərkəzi nəzdində “Azərbaycan obrazı” elmi-tədqiqat laboratoriyası ilə birgə layihə).
· ADU-da fəaliyyət göstərən dil və mədəniyyət mərkəzləri ilə birlikdə ADU tələbələri arasında müxtəlif dillərdə “Zəfər yolu” adlı inşa müsabiqəsini təşkil etmişdir.
· İndoneziya universitetlərində kurslar, yay məktəbləri və elmi jurnallarda ödənişsiz məqalə qəbulu haqqında elanlar hazırlamışdır.
Bundan əlavə, İAM-in müdiri Laura Zərbəliyeva
- İndoneziyanın Kadiri Universiteti ilə imzalanmış anlaşma memorandumu çərçivəsində 1 iyul 2024-cü il tarixində bu universitetin tələbələri qarşısında onlayn formatda “Cross Cultural Understanding: School Vibes in Azerbaijan” mövzusu ilə,
- 3 – 4 may 2024-cü il tarixində Mingəçevir Dövlət Universitetində Azərbaycan xalqının Ümummilli lideri Heydər Əliyevin anadan olmasının 101-ci ildönümünə həsr olunmuş “Heydər Əliyev müasir Azərbaycanın xilaskarı və qurucusudur” adlı respublika elmi konfransında “Heydər Əliyev və Azərbaycan-İndoneziya münasibətləri” adlı məruzə ilə,
- 7 may 2024-cü il tarixində Azərbaycan Dillər Universitetində Ümummilli lider Heydər Əliyevin anadan olmasının 101-ci ildönümünə həsr olunmuş “Heydər Əliyev: multikulturalizm və tolerantlıq ideologiyası” adlı VII Beynəlxalq elmi konfransda “İndoneziyanın dil diplomatiyası” adlı məruzə ilə çıxış etmişdir.
Laura Zərbəliyeva həmçinin Bakı Slavyan Universitetinin “Elmi əsərlər” toplusunda nəşr olunması nəzərdə tutulan “İndoneziya dili beynəlxalq arenada” adlı elmi məqaləsini təqdim etmişdir.
Laura Zərbəliyevanın digər tərcüməçilərlə birlikdə malay dilinə tərcümə etdiyi Azərbaycan hekayələri Malayziyanın Kuala Lumpur şəhərində nəşr edilmişdir (“Coretan Hati”. Antologi Cerpen Azerbaijan / Kuala Lumpur: Institut Terjemahan dan Buku Malaysia Berhad [“Ürəkdə yazı”. Azərbaycan hekayələri antologiyası / Kuala Lumpur: Malayziya Tərcümə və Kitab İnstitutu], 2024).
