Azərbaycan Dillər Universitetinin Muzeyi 2017-ci il sentyabrın 17-dən fəaliyyət göstərir. Muzey 24.08.2023-cü il tarixində ADU-nun rektoru akademik Kamal Abdullayevin 1/263 nömrəli əmrinə əsasən əsaslı təmir edilib və yeni avadanlıqlarla təchiz olunub.
Muzey ekspozisiya otağından və fonddan ibarətdir. Əsas eksponatları universitetin tarixini, fəaliyyətini və uğurlarını əks etdirən sənədli materiallar, məktublar, foto sənədlər, hədiyyələr, diplomlar, kuboklar və digər kateqoriyadan ibarətdir. ADU-nun “Müasir dillər” üzrə dünyada ən yaxşı 301 - 340 universitetlər qrupuna daxil olması haqqında QS 2023 və QS 2024 sertifikatları muzeyin dəyərli eksponatları sırasındadır.
ADU-nun Muzeyində “Səfir saatı” guşəsi də vardır ki, burada universitetə dəvət olunan səfirlər ilə görüşlərdən fotolar yer alır.
Muzeydə universitetin ölkə daxili və ölkə xarici səfərlərdə əldə etdiyi sertifikat, diplom, fəxri fərman, təşəkkürnamələr də saxlanılmaqdadır. Muzeyin rəy kitabında gələn qonaqların universitet haqqında fikirləri yer alır.
Universitetin Muzeyində həmçinin, ADU-nun tələbələri olmuş şəhidlərimiz- Ülvi Bünyadzadə (1969-1990), Əzim Həsənov (1998-2020), Teymur Osmanlı (1995-2020) və Elvin Bayramovun (1999-2020) fotoları olan guşə var.
ADU-nun Muzeyində Azərbaycan Respublikasının Prezidentinin 1 iyun 2017-ci il tarixli sərəncamı ilə akademik Kamal Mehdi oğlu Abdullayevin Azərbaycan Dillər Universitetinin rektoru təyin olunması və publik hüquqi şəxs statusuna malik olan Azərbaycan Dillər Universitetinin yenidən təşkil olunması barədə Azərbaycan Respublikasının Prezidentinin 16 iyun 2017-ci il tarixli sərəncamı da əks olunub.
ADU-nun Muzeyində 12 nəfər tələbə tutumlu oturacaqlar müəllim və tələbə heyətinin ixtiyarına verilib. Burada müxtəlif sərgilər, tədbirlər, görüşlər də həyata keçirilir.
Muzey həftəiçi hər gün saat 09:00-17:00 açıqdır.
Muzey şöbəsinin müdiri: Lalə Məmmədova
Ünvan: Rəşid Behbudov 134, ADU-nun əsas tədris binası, I mərtəbə
Əlaqə: (055) 919-77-85
Daxili nömrə: 131
E-mail: [email protected]