Davamlı İnvestisiya Siyasəti
Bu siyasətin rəsmi nüsxəsini əldə etmək üçün müraciət edə bilərsiniz.
Əlaqə məlumatları:
Ünvan: Bakı şəhəri, Rəşid Behbudov küçəsi 134, Baş kampus, II mərtəbə, Davamlı İnkişaf Komitəsinin otağı, № 209
Telefon: (+994 12) 441 22 31
E-poçt: [email protected]
Veb-sayt: https://adu.edu.az/
I BÖLMƏ
Giriş
Bu İnvestisiya Siyasətinin məqsədi Azərbaycan Dillər Universitetinin maliyyə resurslarının səmərəli idarə olunmasını təmin etmək, universitetin uzunmüddətli inkişafını və davamlılığını dəstəkləməkdir. Bu sənəd universitetin yüksək keyfiyyətli təhsil və elmi-tədqiqat imkanları yaratmaq missiyası ilə uzlaşan investisiya fəaliyyətlərinə dair strateji məqsədləri, qaydaları və prosedurları müəyyən edir.
Məqsəd
Azərbaycan Dillər Universiteti üçün hazırlanmış İnvestisiya Siyasətinin əsas məqsədi maliyyə resurslarının effektiv idarə olunması yolu ilə təhsil, tədqiqat və infrastruktur sahələrində uzunmüddətli inkişafın təmin edilməsidir. Siyasət beynəlxalq əlaqələrin gücləndirilməsi, müasir infrastrukturun yaradılması və təhsilin keyfiyyətinin artırılmasına yönəlmişdir. Eyni zamanda, maliyyə sabitliyinin təmin edilməsi məqsədilə investisiyaların diversifikasiyası və risklərin idarə olunması bu siyasətin əsas komponentlərindəndir.
II BÖLMƏ
Əhatə dairəsi
Bu siyasət universitet tərəfindən həyata keçirilən bütün investisiyalara, o cümlədən pul vəsaitlərinə, əsaslı xərclərə, gəlir xərclərinə və digər resurslara şamil olunur.
III BÖLMƏ
Davamlı İnvestisiya Məqsədləri
Azərbaycan Dillər Universitetinin İnvestisiya Siyasətinin əsas məqsədləri aşağıdakılardır:
1. Təhsil və Tədqiqatın Gücləndirilməsi: Maliyyə resurslarının səmərəli idarə olunması yolu ilə universitetin təhsil və tədqiqat fəaliyyətlərinin inkişaf etdirilməsi, akademik proqramlar, laboratoriyalar və tədris materialları da daxil olmaqla təhsil və tədqiqat infrastrukturunun gücləndirilməsinə investisiya ayrılması.
2. İnfrastrukturun Təkmilləşdirilməsi: Kampus binalarının, tələbə yataqxanalarının və digər fiziki infrastrukturun tikintisi, yenilənməsi və modernləşdirilməsinə investisiya yatırmaqla optimal tədris mühitinin yaradılması.
3. Beynəlxalq Əlaqələrin Qurulması: Beynəlxalq tərəfdaşlıqlar və akademik mübadilə proqramlarına, eləcə də beynəlxalq elmi-tədqiqat əməkdaşlıqlarına investisiya qoymaqla universitetin qlobal nüfuzunun artırılması.
4. Diversifikasiya və Risklərin Azaldılması: İnvestisiyaların müxtəlif sahələr üzrə diversifikasiyası və əlaqəli risklərin idarə olunması yolu ilə maliyyə sabitliyinin təmin edilməsi.
5. Uzunmüddətli Davamlı İnkişaf: Universitetin təhsil, tədqiqat və infrastruktur sahələrində davamlı inkişafı üçün maliyyə resurslarının ayrılması.
IV BÖLMƏ
Davamlı İnvestisiya Prinsipləri
Universitetin investisiya yanaşması aşağıdakı prinsiplərə əsaslanacaqdır:
Diversifikasiya: İnvestisiyalar təhsil infrastrukturu, texnologiya və xarici tərəfdaşlıqlar da daxil olmaqla müxtəlif sahələr üzrə şaxələndiriləcəkdir ki, bu da maliyyə risklərinin azaldılmasına və gəlirlərin artırılmasına xidmət edəcək.
Risklərin İdarə Edilməsi: İnvestisiya qərarları risklərin diqqətlə nəzərə alınması ilə, məlumatlara əsaslanan təhlillər və kompleks risk idarəetmə strategiyası əsasında qəbul ediləcək.
Monitorinq və Qiymətləndirmə: İnvestisiyaların effektivliyini və universitetin strateji məqsədlərinə uyğunluğunu təmin etmək məqsədilə mütəmadi olaraq qiymətləndirmələr aparılacaq və zəruri hallarda düzəlişlər ediləcək.
V BÖLMƏ
Rəhbərliyin Öhdəliyi
Azərbaycan Dillər Universitetinin rəhbərliyi bu Davamlı İnvestisiya Siyasətinin səmərəli şəkildə icrasını dəstəkləməyə və təşviq etməyə sadiqdir. Universitetin maliyyə resurslarının davamlılıq prinsipləri ilə uyğunlaşdırılması rəhbərliyin əsas prioritetlərindəndir.
VI BÖLMƏ
Əməkdaşlıq və Tərəfdaşlıqlar
Universitet, davamlı investisiya məqsədləri uyğun olan digər təhsil müəssisələri və təşkilatlarla əməkdaşlıq edərək birgə təsir gücünü artırmaq və daha geniş miqyasda fayda əldə etmək üçün tərəfdaşlıqlara qoşulacaqdır.
Maliyyə Resursları
Universitetin investisiya resursları aşağıdakı mənbələrdən formalaşacaq:
Dövlət maliyyələşməsi: Ali təhsil sahəsi üçün dövlət büdcəsindən ayrılan vəsaitlər.
Daxili gəlirlər: Təhsil haqları, akademik proqramlar və elmi-tədqiqat qrantları kimi universitetin fəaliyyətindən əldə olunan gəlirlər.
Xarici tərəfdaşlıqlar və qrantlar: Beynəlxalq təşkilatlar, tədqiqat institutları və özəl sektor tərəfdaşlarından alınan vəsaitlər.
Əlavə gəlir mənbələri: Universitet ixtisaslaşdırılmış kurslar, sertifikat proqramları və məsləhət xidmətləri kimi əlavə gəlir mənbələrini araşdıra bilər.
VII BÖLMƏ
Məsuliyyətlər
Universitet rəhbərliyi – Prorektor, Prorektor köməkçiləri və fakültə dekanları – Davamlı İnvestisiya Siyasətinin mütəmadi olaraq nəzərdən keçirilməsi, yenilənməsi və təsdiq edilməsinə cavabdehdir. Onlar, həmçinin bu siyasətin universitet daxilində tətbiqinə və icrasına nəzarət edir, müəyyən olunmuş normativ-hüquqi çərçivəyə uyğunluğunu təmin edirlər.
Maliyyə Direktoru, Davamlı İnvestisiya Siyasətinin və əlaqəli prosedurların həyata keçirilməsinə cavabdehdir. Eyni zamanda, o, əsas fəaliyyət göstəriciləri (KPI-lər) və maliyyə hesabatları vasitəsilə davamlı investisiyaların idarə olunmasına və hesabatlılığına məsuliyyət daşıyır.
VIII BÖLMƏ
Şəffaflıq və Hesabatlılıq
Hesabatlılıq: Universitet öz rəhbərliyinə, maraqlı tərəflərə və ictimaiyyətə mütəmadi olaraq investisiya fəaliyyətləri, maliyyə göstəriciləri və strateji məqsədlərə doğru irəliləyiş barədə hesabatlar təqdim edəcəkdir.
Audit: Siyasətə, qanunvericiliyə və normativ tələblərə uyğunluğu təmin etmək məqsədilə universitetdə müstəqil audit yoxlamaları dövri olaraq aparılacaqdır.
IX BÖLMƏ
İcmal
Davamlı İnvestisiya Siyasəti hər il İnvestisiya Alt-Komitəsi tərəfindən nəzərdən keçirilir, qiymətləndirilir və monitorinq olunur. Bu komitə universitetin Davamlılıq komandası ilə əməkdaşlıq edərək siyasətin tətbiqini dəyərləndirir və Davamlılıq Komitəsi ilə Maliyyə Departamentinə təqdim olunacaq tövsiyələri hazırlayır.
Azərbaycan Dillər Universiteti maliyyə resurslarının səmərəli istifadəsinə və bu yolla təhsil və elmi tədqiqat sahələrində yüksək keyfiyyətin təmin olunmasına sadiqdir. Bu İnvestisiya Siyasəti universitetin infrastrukturun yaxşılaşdırılması, akademik keyfiyyətin artırılması və beynəlxalq nüfuzunun gücləndirilməsi istiqamətində uzunmüddətli davamlı inkişaf və böyümə səylərinin əsasını təşkil edəcəkdir.