Azərbaycan Dillər Universiteti (ADU) davamlılığa xüsusi önəm verir və müxtəlif fəaliyyət sahələrində ətraf mühit və sosial məsuliyyət sahəsində ən yaxşı təcrübələrin nümayiş etdirilməsi, təşviqi və yayılması istiqamətində sadiqliyini nümayiş etdirir.
ADU davamlı inkişaf, sosial məsuliyyət, yaxşı idarəetmə və ətraf mühitə qarşı məsuliyyət prinsiplərinə əsaslanan bir qurum kimi fəaliyyət göstərməyə sadiqdir. Davamlılıq Universitetin Strateji Planının əsas istiqamətlərindən birini təşkil edir. Universitetin bütün fəaliyyət sahələrində dayanıqlı gələcəyin təmin olunması və bu sahədə əldə olunan ən yaxşı təcrübələrin gələcək nəsil tələbə və müəllimlərə ötürülməsi istiqamətində ardıcıl və fəal şəkildə işlər aparılır.
ADU yaşıl siyasətə, resursların səmərəli istifadəsinə, tullantıların azaldılması və təkrar emalı, eləcə də biomüxtəlifliyin qorunmasına yönəlmiş təşəbbüsləri dəstəkləyir və həyata keçirir. Qeyd etmək lazımdır ki, ADU davamlı inkişaf üzrə bakalavr pilləsi üçün tədris kursunu hazırlayıb və tətbiq edən ilk universitetlərdən biridir.
Bununla yanaşı, ADU enerji sərfiyyatı, su ehtiyatlarından istifadə, tullantıların idarə olunması, biomüxtəlifliyin qorunması və yaşıllaşdırma sahəsində fəaliyyətinin təkmilləşdirilməsinə yönəlmiş uğurlu tədbirlər həyata keçirmişdir. Hazırkı strategiya bu təşəbbüslərin inkişaf etdirilməsi, təbii ehtiyatlardan dayanıqlı və etik baxımdan məsuliyyətli istifadəyə xidmət edən iş metodlarının formalaşdırılması və möhkəmləndirilməsini qarşıya məqsəd qoyur.
Biomüxtəliflik və ekosistemlər Azərbaycan Dillər Universitetinin ayrılmaz tərkib hissəsidir. Şübhəsiz ki, Universitetin fəaliyyəti biomüxtəlifliyə, mövcud yaşayış mühitinə və ekosistemlərə təsir göstərir. Bu baxımdan, 2023-cü il mayın 19-da Ümummilli Lider Heydər Əliyevin anadan olmasının 100 illiyi münasibətilə Azərbaycan Dillər Universitetində keçirilən silsilə tədbirlər çərçivəsində universitet əməkdaşlarının iştirakı ilə ağacəkmə aksiyası təşkil olunmuşdur.
Aksiyada ADU-nun rektoru, akademik Kamal Abdulla, professor-müəllim heyəti, universitet əməkdaşları və tələbələr iştirak etmişlər.
Tədbir ADU-nun əsas tədris korpusunda və Təbriz küçəsi 81 ünvanında yerləşən kampusunda baş tutmuşdur.
Ağacəkmə aksiyalarının keçirilməsində məqsəd daim yaşıllığın artırılmasına, sağlam ətraf mühitin yaradılmasına xüsusi diqqət yetirən ümummilli lider Heydər Əliyevin əziz xatirəsini yad etmək və təbiətə, yaşıllığa qayğını özündə əks etdirən milli liderin ənənələrini davam etdirməkdir.
Davamlılıq strategiyası çərçivəsində ADU daxilində və xaricində həyata keçirilən fəaliyyətlər nəticəsində yarana biləcək mümkün ekoloji təsirlərin effektiv şəkildə idarə olunması və nəzarətdə saxlanılması üçün bütün imkanlar səfərbər olunmuşdur. Bu yanaşma həm də tələbələrin müvafiq sahədə bilik və təcrübələrinin artırılmasına, eyni zamanda Azərbaycan Dillər Universitetinin ictimai nüfuzunun möhkəmləndirilməsinə xidmət edir.
Su – səmərəli istifadəsi çox zaman diqqətdən kənarda qalan ən qiymətli resurslardan biridir. Universitet su ehtiyatlarının idarə olunması sahəsində ən yaxşı təcrübələrin tətbiqinə və yayılmasına sadiqdir. Qısa müddətli prioritetlərdən biri də köhnəlmiş supaylayıcı infrastrukturun yenisi ilə əvəz olunmasıdır ki, bu da suyun daha səmərəli istifadəsinə imkan verir. Universitet, həmçinin, kampus ərazisində təmizlik və suvarma məqsədilə yeraltı sulardan istifadə edir.
Su təchizatına nəzarət və tullantı sularının idarə olunması məqsədilə sualtı ölçü sistemləri yenilənmişdir.
Azərbaycanda su resurslarından səmərəli istifadənin təşviqi məqsədilə həyata keçirilən "Bir Damcı" kampaniyası davam etdirilir.
Kampaniyanın əhatə dairəsinin genişləndirilməsi məqsədilə reklam çarxlarından əlavə olaraq, şəhərin müxtəlif ərazilərində küçə reklamları və plakatlar yerləşdirilmiş, radiostansiyalarda elanlar yayımlanmış, sosial şəbəkələrdə interaktiv məzmunlar paylaşılmışdır.
Azərbaycan Dillər Universitetində də bu təşviqat işlərinin bir hissəsi olaraq, universitet divarlarına maarifləndirici plakatlar və lövhələr vurulmuş, tələbələr arasında məlumatlandırıcı söhbətlər təşkil olunmuşdur.
“Bir Damcı” kampaniyası Azərbaycan Respublikasının Ekologiya və Təbii Sərvətlər Nazirliyi, “Azərsu” ASC, “Azərbaycan Meliorasiya və Su Təsərrüfatı” ASC və IDEA İctimai Birliyi tərəfindən birgə təşkil olunur.
2024-cü il fevralın 23-dən etibarən IDEA İctimai Birliyi Azərbaycan Respublikasının Elm və Təhsil Nazirliyi və “Azərsun” şirkəti ilə birgə tullantıların idarə olunması proqramı çərçivəsində kağız və plastik tullantıların toplanması və təkrar emalına həsr olunmuş yeni layihəyə start vermişdir.
Layihə çərçivəsində ali təhsil müəssisələrində kağız və plastik tullantılar üçün xüsusi çeşidləmə qutularının yerləşdirilməsi nəzərdə tutulur. Layihənin pilot mərhələsi olaraq ümumilikdə 200 konteyner Bakı Dövlət Universitetinə, Azərbaycan Respublikasının Prezidenti yanında Dövlət İdarəçilik Akademiyasına, Azərbaycan Dövlət Neft və Sənaye Universitetinə, Azərbaycan Dillər Universitetinə, Azərbaycan Texniki Universitetinə və Azərbaycan Dövlət İqtisad Universitetinə təhvil verilmişdir.
Azərbaycan Dillər Universiteti qəbul edir ki, universitetin gündəlik fəaliyyəti nəticəsində müəyyən həcmdə tullantıların yaranması qaçılmazdır. Lakin resurslardan həddindən artıq və səmərəsiz istifadə tullantı həcminin artmasına və ətraf mühitə mənfi təsirə səbəb olur. Bu səbəbdən resursların həddindən artıq istehlakının qarşısını alan və tullantıların yaranmasını mənbə səviyyəsində azaldan daha dayanıqlı fəaliyyət modellərinin tətbiqi zəruridir.
Universitet ərazisindən istifadə edən hər kəsin tullantıların yaranmasında rolu olduğu üçün onların həcminin azaldılması istiqamətində kollektiv və məqsədyönlü tədbirlərin görülməsi vacibdir.
05 mart 2018-ci il – ADU bülletenində ekoloji məsələyə toxunulub.
Azərbaycan Dillər Universitetinin Beynəlxalq əlaqələr şöbəsinin nəşri olan “Outside the Box” adlı bülletendə kağızın təkrar emalı ilə bağlı maarifləndirici bölmə yer almışdır.
“Gəlin hər vərəqi yarpağa çevirək” adlı bölmədə istifadə olunmuş kağızların təkrar emalının vacibliyinə diqqət çəkilmiş və tələbələr arasında bu mövzuda maarifləndirmə işi aparılmışdır. Qeyd olunmuşdur ki, maarifləndirmənin artırılması və davranış dəyişikliyinin təşviqi tullantıların idarə olunması və təkrar emal sahəsində əsas amillərdən biridir.