Azərbaycan Dillər Universitetinin Regionşünaslıq kafedrasının   baş müəllimi Hökümə Abbasova 8-13 sentyabr 2024-cü il tarixlərində Karakas şəhərində keçirilən ”Faşizm, Neofaşizm və Bənzər İfadələrə qarşı Ümumdünya Konqresi”ndə  iştirak etmək üçün Venesuellada işgüzar səfər olub.

10-11 sentyabr 2024-cü il tarixlərində Karakas şəhərində baş tutan Konqresin əsas məqsədi  bəşəriyyəti  nifrəti, dözümsüzlük və zorakılığı təşviq edən faşist və neofaşist hərəkatları ilə mübarizəyə səsləmək olub.  

Bu məqsədlə dünyanın 95 ölkəsindən 950-yə yaxın siyasi partiya üzvləri, sosial hərəkatçılar, jurnalist və influenserlər, akademik və ziyalılar bir araya gəlib. Konqresdə həmçinin Venesuellanın  vitse-prezidenti, daxili işlər naziri və digər dövlət rəsmiləri, o cümlədən, dövlət başçısı Nikolas Maduro Morosu iştirak edib və Venesuella xalqının yaşadığı bu tip təhdidlərdən danışıb.

Konqres zamanı yerli və xarici nümayəndələr öz ölkələrinin faşizim, neofaşizm və imperializmlə bağlı təcrübələri və onlara qarşı mübarizəsindən bəhs edib, müxtəlif panel müzakirələri zamanı bu tip meyylərə qarşı mübarizə metodlarının formalaşmasından danışıblar. Konqresin sonunda faşizm və neofaşizmə qarşı mübarizə hərakatının yaradılması qərara alınıb.

Konqresdə Venesuellanın Azərbaycandakı Səfirliyinin dəvəti ilə Azərbaycandan 3 nümayəndə iştirak edib. Hökümə Abbasova  Konqresdə “Azərbaycanın Faşizm və Neofaşizmə qarşı mübarizəsi” adlı məqalə ilə iştirak edib.

Bildirilib ki, Konqresdəki çıxışların  Konqres toplusunda nəşr edilməsi nəzərdə tutulur.