Azərbaycan Dillər Universitetində yeni inkişaf strategiyalarının formalaşdırılması, tədrisin keyfiyyətinin artırılması və institusional idarəetmənin təkmilləşdirilməsi məqsədilə Beynəlxalq əlaqələr üzrə prorektorluğun nəzdində Strateji inkişaf və planlama şöbəsi təsis edilib.

Strateji inkişaf və planlama şöbəsinin əsas funksiyası universitetin gələcək inkişafını istiqamətləndirəcək strateji hədəflərin müəyyənləşdirilməsi, onların reallaşdırılması və davamlı monitorinqinin həyata keçirilməsidir. Şöbə ali təhsil sahəsində müasir tələblərə uyğun olaraq keyfiyyətin yüksəldilməsi, tədqiqat potensialının gücləndirilməsi və beynəlxalq reytinqlərdə mövqelərin yaxşılaşdırılması üçün kompleks planlar hazırlayır və icra edir.

Şöbə, universitetin digər əsas struktur bölmələri – Tədris, Daxili Nəzarət, Beynəlxalq Əlaqələr və İnsan Resursları və s. şöbələri ilə qarşılıqlı əməkdaşlıq şəraitində fəaliyyət göstərir və strateji qərarların gündəlik əməliyyatlara inteqrasiyasını təmin edir.

Bununla yanaşı, şöbənin səmərəli fəaliyyətini təmin etmək məqsədilə peşəkar kadrların cəlb olunması, işçi heyətinin formalaşdırılması və uyğun vəzifələrə təyinat prosesi mərhələli şəkildə həyata keçirilir.

Strateji inkişaf və planlama şöbəsi həm qısamüddətli, həm də uzunmüddətli inkişaf planlarının reallaşdırılmasına nəzarət edir, bu istiqamətdə idarəetmə proseslərinin təkmilləşdirilməsi, daxili resursların səmərəli istifadəsi və institusional davamlılığın təmin olunması üçün zəruri tədbirlər görür.