Azərbaycan Dillər Universitetində (ADU) fəaliyyət göstərən Şeyx Zayed adına Ərəb dili auditoriyasında Birləşmiş Ərəb Əmirliyində qeyd edilən 3 noyabr - Bayraq Günü münasibətilə tədbir keçirilib.

Tədbirdə Azərbaycan Dillər Universitetinin prorektorları, dekanları, mərkəz müdirləri, universitetin Tərcümə və Regionşünaslıq fakültələrinin Ərəb dili ixtisasında təhsil alan tələbələri iştirak ediblər.

Açılış nitqi ilə çıxış edən adıçəkilən auditoriyanın müdiri, filologiya üzrə fəlsəfə doktoru Ülviyyə Hüseynova Birləşmiş Ərəb Əmirliyinin Bayraq Günü haqqında ətraflı məlumat verib. Ülviyyə Hüseynova, həmçinin əlamətdar gün münasibəti ilə Azərbaycan Dillər Universitetinin adından qardaş əmirlik xalqını təbrik edib.

 Universitetin Tərcümə və Regionşünaslıq fakültələrinin Ərəb dili ixtisasında təhsil alan tələbələri Bayraq Günü münasibətilə Azərbaycan və ərəb dillərində çıxış edib, şeirlər səsləndirib, mahnılar ifa ediblər.

Tədbirin sonunda isə Ərəbşünas tələbələr tərəfindən hazırlanan təbrik videoçarxı nümayiş olunub.