Oktyabrın 4-də Venesuelanın ölkəmizdəki səfiri Kristofer Martinez və şair Ana Maria Oveido Azərbaycan Dillər Universitetinin (ADU) qonağı olub. 

ADU-nun rektoru, akademik Kamal Abdulla ilə görüşdə bədii sözün xalqları bir-birinə yaxından tanıdan, dostluq münasibətlərini daha da sıxlaşdıran ən təsirli vasitə olduğu qeyd edilib.

Qeyd olunub ki, ADU-nun tələbələri ispan dilini, ispandilli ölkələrin mədəniyyətini və tarixini böyük həvəs və maraqla öyrənirlər.

Qonaq minnətdarlığını bildirərək, Azərbaycan-Venesuela ədəbi əlaqələrinin genişləndirilməsi, Azərbaycan poeziyasının Venesuelada tanıdılması ilə bağlı fikir və təkliflərini dilə gətirib. O, dilimizə tərcümə olunmuş məşhur “Söyüd krallığı” kitabını  ADU-nun kitabxanasına hədiyyə edib.

Daha sonra Ana Maria Oveido tələbələrlə görüşərək onlarla səmimi söhbət aparıb.

Tədbir iştirakçılarının suallarını cavablandıran şair, eyni zamanda şeirlərindən nümunələr səsləndirib.