XƏBƏRLƏR

ADU-da tədqiqatçı-jurnalist Vasif Quliyevlə görüş keçirilib

26 may, 2022

ADU-da tədqiqatçı-jurnalist Vasif Quliyevlə görüş keçirilib

 

 Azərbaycan Dillər Universitetində universitetin Beynəlxalq Münasibətlər və Regionşünaslıq fakültəsinin Regionşünaslıq kafedrası və Azərbaycanşünaslıq Mərkəzinin birgə təşkilatçılığı ilə yazıçı, publisist, “Şuşa" qəzetinin redaktoru, araşdırmaçı, tədqiqatçı-jurnalist Vasif Quliyevlə görüş keçirilib.

 Regionşünaslıq kafedrasının müdiri, dosent  Sevdagül Əliyeva Azərbaycanda  ilk mətbuat orqanlarının yaranması, inkişafı, kütləvi informasiya vasitələrinin əhəmiyyəti barədə məlumat verdikdən  sonra  qonağı iştirakçılara təqdim edib.

Qonaq  tədqiqatçı-jurnalist  Vasif Quliyev yaradıcılığından danışarkən  “Şuşa” qəzetinə gəlişi, qaçqınlıq dövründə qəzetin dərc edilməsi ilə bağlı gördüyü çətinliklərdən  söz açıb.  O, araşdırmaçılıq və tədqiqatçılıq barədə də məlumat verib.  Bildirib ki,   bütün tarixi məlumatların hazırlanması üçün hər bir tədqiqatçı faktlar arxivlərdən toplamalı və ayrı-ayrı mənbələrlə müqayisə edərək  hazırlamalıdır.

Görüşdə iştirakçılar- Qafqazşünaslıq kafedrasının müdiri, dos.X.Hacıyeva,  və dosenti Q.Mustafayev, Azərbaycanşünaslıq Mərkəzinin professoru N.Mehdi və Beynəlxalq Münasibətlər və Regionşünaslıq fakültəsinin dekanı   tarix üzrə fəlsəfə doktoru İbrahim Kazımbəyli  və digərləri  tədqiqatçı-jurnalist  Vasif Quliyevə yazdığı əsərləri  və gələcək fəaliyyəti haqqında suallar veriblər.

Qeyd edək ki, Vasif Quliyev Şuşanın Malıbəyli kəndində anadan olub.  Azərbaycan Dövlət Universitetinin Jurnalistika fakültəsini bitirib. O, Azərbaycan Dövlət Televiziya və Radio Verilişləri Komitəsində çalışıb. Hazırda “ Günəş” uşaq jurnalının baş redaktoru və Şuşa qəzetinin direktorudur. V. Quliyev 10-a yaxın tərcümə edilmiş,  20- dən artıq  bədii, tarixi, publisistik əsərlərin müəllifidir.