Sentyabrın 28-də Azərbaycan Dillər Universitetində yeni tədris ilinin başlanması ilə əlaqədar  Elmi Şuranın növbəti iclası keçirilib. İclasda Vətən yolunda canından keçən şəhidlərin əziz xatirəsi bir dəqiqəlik sükutla yad olunub.  

Universitetin rektoru, akademik Kamal Abdulla 27 sentyabr Anım Günü münasibəti ilə ADU-da təşkil olunan tədbirlərdən danışıb, Vətən müharibəsinin Azərbaycan xalqının taleyində oynadığı böyük rola toxunub. Rektor qeyd edib ki, sentyabrın 29-da tələbələr ilk dərsdə unudulmaz şəhidlərin xatirəsini bir dəqiqəlik sükutla yad edəcəklər: “Qələbə bizim hamımız üçün dərs oldu ki, biz bir daha unutqanlığa yuvarlanmayaq. Dərs oldu ki, gələcəyimizi güclü şəkildə qurmaqla, gəncliyimizi güclü şəkildə yönəltməklə güclü dövlət və xalq ola bilərik”.

Nazirlər Kabinetinin təhsil üzrə tədris və təlimlə bağlı qərarlarının həyata keçirilməsi, dərslərin ənənəvi qaydada təşkili ilə bağlı danışan rektor müəllimlərə bu istiqamətdə xüsusi ilə diqqətli olmağı, dərs bölgüsündə hər bir tələbənin tədris proqramı ilə əhatə olunmasının vacibliyini qeyd edib:

“Bu il Azərbaycan Dillər Universiteti tələbələrin qəbul olma göstəricilərinə görə yeni bir uğura imza atıb. Belə ki, bu il qəbul planının 98,5 faizi yerinə yetirilib. Bu da çox yaxşı bir nəticədir. İldən ilə universitetin qəbul göstəriciləri artan dinamika ilə davam edir. Bu onu göstərir ki, cəmiyyət bizə inanır, öz övladlarının bu təhsil ocağında təhsil almasını istəyir. Bu etimadı doğrultmalıyıq. Bizə etibar olunan əmanəti qorumalıyıq.” 

Rektor kafedra müdirlərinə yeni tədris ilində gənc alimlərin və müəllimlərin elmi potensialının artırılması üçün geniş imkanların yaradılmasının zəruriliyini vurğulayıb. Dünya təhsil sistemində gedən proseslərə fəal şəkildə qoşulmağın və bu istiqamətdəki yenilikləri bizim təhsil sistemimizə tətbiqinin vacibliyini önə çəkib.

Tədris şöbəsinin müdiri Şəfəq Şahməmmədova ADU-nun yeni tədris ilində tədris planına uyğun olaraq fəaliyyət göstərəcəyini və mövcud pandemiya vəziyyətinə uyğun dərslərin təşkil olunacağını söyləyib. Tədris ilə bağlı bir sıra məsələlər diqqətə çatdırılıb və təkliflər edilib. Təkliflər Elmi şuranın qərarı ilə qəbul olunub.

Tələbə qeydiyyatı və biliyin qiymətləndirilməsi şöbəsinin müdiri Fatma Qurbanzadə yay məktəbinin fəaliyyəti və işi haqqında hesabat verib. Ölkənin digər ali təhsil ocaqlarından tələbələrin tədrisə cəlb olunduğunu və tədrisin yüksək keyfiyyətlə təşkil olunduğunu vurğulayıb.

Kadrlar şöbəsinin müdiri Ağamusa Səfiyev ADU əməkdaşlarının peyvəndlənmə göstəriciləri barədə məlumat verib. Eyni zamanda yaşı 18-dən yuxarı olan tələbələrin də bu prosesə qoşulduğunu bildirib. Əməkdaşların və müəllimlərin hər iki dozada peyvənd qəbul etməsinin yuxarı göstəricidə olduğu qeyd olunub.
Beynəlxalq əlaqələr üzrə prorektor Jalə Qəribova ADU-nun beynəlxalq əlaqələrinin inkişaf etdiyini, ikili diplom layihələrinin uğurla icra olunduğunu söyləyib. Beynəlxalq əməkdaşlıq çərçivəsində ADU-nun Argentina ilə təhsil mübadiləsindən söz açıb. Ölkəmizdə yerləşən Argentina səfirliyinin qarşılıqlı əməkdaşlıq sahəsində əlaqələrin qurulması ilə bağlı məktubu oxunub.

Sonra universitetin daxili nizam və intizam qaydaları ilə bağlı məsələlərə toxunulub, bir sıra təkliflər irəli sürülüb.