XƏBƏRLƏR

ADU-da İngilis dili mütəxəssisləri üçün yeni təlimlər başlayır

27 sentyabr, 20193

Azərbaycan Dillər Universiteti (ADU) keyfiyyətli təhsil proqramı ilə ölkənin seçilən ali məktəbləri sırasındadır. Müasir standartlara cavab verən universitet hər zaman dövlətə və dövlətçiliyə sədaqət ruhunda gənc nəsil yetişdirir. ADU-nun nəzdində fəaliyyət göstərən Dil və Tərcümə Xidmətləri Mərkəzi də bu istiqamətdə atılan addımlardan biridir. Universitetin rektoru,xalq yazıçısı, akademik Kamal Abdulla tərəfindən mərkəzin qarşısında önəmli məqsədlər qoyulub. Bu məqsədlərdən biri də müəllimlərin yüksəkixtisaslı kadr kimi yetişməsi üçün beynəlxalq təhsil sistemində ən qabaqcıl təlimlər təşkil etməkdir.

Azərbaycanda ingilis dili mütəxəssislərinə, umumiyyətlə ingilis dilini öyrənənlərə və müəllimlərə dəstək üçün bir sıra layihələr təşkil edilir. Mərkəz ingilis dili üzrə tədris proqramlarını təlim sessiyaları vasitəsilə həyata keçirir. Məqsəd dil öyrənənlərin, eləcə də müəllimlərin ingilis dili bacarıqlarını artırmaq və onlara yeni perspektivlər təklif etməkdir. Bu məqsədlə mərkəzdə indiyədək TKT - “Teaching Knowledge Test” (tədris bilik və bacarıqları üzrə test) təlimi, akademik yazı və oxu təlimi, APTİS test təlimi, “Peşəkar tərcümənin əsasları” silsiləsindən təlim, “Diplomatik tərcümə” üzrə təlim təşkil olunub. Təlimlərdə ümumilikdə 250 nəfər iştirak edib. Təlimlər Bakı Mühəndislik Universiteti, Azərbaycan Dövlət Pedaqoji Universiteti, Azərbaycan Turizm və Menecment Universiteti və Avrasiya Universiteti ilə əməkdaşlıq çərçivəsində reallaşıb. Bu ali məktəblərdən tələbə və müəllimlər mərkəzdə keçirilən təlimlərdə fəal iştirak edib və sonda sertifikatlarla təltif olunublar.

Müəllimlər üçün Aptis test təlimi - Bu proqram bütün dünyada müəllimlərin ingilis dili bacarıqlarını yoxlamaq üçün Təhsil Nazirlikləri və təhsil müəssisələri  tərəfindən istifadə edilə bilən bir təlimdir. Bu, məxsusi olaraq təhsil sektoru üçün işlənib hazırlanmışdır; tam olaraq mövcud sistemlərə inteqrasiya oluna və yerli qaydada idarə edilə bilər ki, bu da müəllimlərin ingilis dili səviyyəsinin vaxt keçdikcə müşahidə edilməsinə və təlim proqramlarının uğurunun effektiv şəkildə ölçülməsinə imkan verir.

 

HANSI NÖV MÜƏSSİSƏLƏR APTİS TESTİNDƏN İSTİFADƏ EDİRLƏR?

Aptis-dən istifadə edən müəssisələrin sırasına nazirliklər, universitetlər, dil məktəbləri, beynəlxalq və özəl məktəblər daxildir.

APTİS test təlimi dil daşıyıcısı olmayan ingilis dili müəllimləri üçün peşəkar tədris bilik və bacarıqları üzrə test imtahanıdır. Bu, tədris təcrübəsindən asılı olmayaraq bütün müəllimlər üçün ideal bir şansdır.

Müəllimlər üçün Aptis proqramının test məzmunu konkret olaraq müəllimlərə aiddir və suallar müəllimlərin hər gün rastlaşdıqları mövzu və ssenariləri əhatə edir. Nəticədə, suallar namizədlərə tanış gəlir və onlar sualın məzmununa deyil, konkret olaraq dilə fokuslana bilirlər.

MÜƏLLİMLƏR ÜÇÜN APTİS PROQRAMI AŞAĞIDAKILARIN TEST EDİLMƏSİ ÜÇÜN İSTİFADƏ OLUNA BİLƏR:

Bütün dünyada universitetlərdə və məktəblərdə dərs deyən ingilis dili müəllimləri

Bütün dünya universitetlərində və məktəblərində dərs deyən digər fənn müəllimləri

Geniş miqyaslı dil proqramlarının, o cümlədən kommersiya xarakterli proqramların ingilis dili müəllimləri

Müəllimlərin təlimi və ya universitet proqramlarının tələbələri

Təhsil sahəsində çalışan digər mütəxəssislər

İNGİLİS DİLİ BACARIQLARINI DƏQİQ NECƏ QİYMƏTLƏNDİRMƏK OLAR? Aptis beynəlxalq səviyyəli ingilis dili testidir və aşağıdakı qaydada istifadə oluna bilər:
  • İngilis dilinin inkişaf etdirilməsi proqramının tərkib hissəsi kimi
  • Müəllimlərinizin və ya tələbələrinizin təlim ehtiyaclarını müəyyən etmək üçün yoxlama vasitəsi kimi
  • İngilis dili proqramının effektivliyini dəyərləndirmək üçün tədris ilinin əvvəlində, ortasında və sonunda
  • Test iştirakçılarının güclü və zəif tərəflərini müəyyən etmək üçün
 

FAYDALARI:

Oxu, yazı, danışıq və dinləmə bacarıqlarını ayrı-ayrılıqda və ya birlikdə qiymətləndirir.

Danışıq və yazı bacarıqları ingilis dili mütəxəssislərindən ibarət  heyət tərəfindən qiymətləndirilir ki, bu da yüksək səviyyədə dəqiqliyi təmin edir.

Aptis çoxsaylı formatlarda, istənilən vaxt, istənilən yerdə operativ nəticələrlə təqdim edilə bilər.

Aptis müəllimlərin etibarlı şəkildə qiymətləndirilməsinə imkan verən operativ, ədalətli və mötəbər test sistemidir və ingilis dili bacarıqlarının dəqiq və etibarlı şəkildə qiymətləndirilməsini təmin edir.

Aptis beynəlxalq miqyasda Dillər üçün Vahid Avropa Etalon Sisteminə əsasən fəaliyyət göstərir və siz məhz hansı sahələrdə təkmilləşdirməyə ehtiyac olduğunu asanlıqla müəyyən edə bilirsiniz. Bu isə, ingilis dili kurslarının düzgün təşkil edilməsinə imkan verir.

Dil və Tərcümə Xidmətləri Mərkəzi peşəkar insanların öz potensialını artırmasına və karyera yüksəlişinə nail olmasına şərait yaratmaq məqsədilə bu kimi təlimlər, eyni zamanda, imtahanlar təşkil edir. Beynəlxalq səviyyədə tanınan bu imtahanlar nəticəsində əldə olunan sertifikatlar bəzən şirkət və müəssisələrin yeni və mövcud işçilər üçün qoyduğu qaçılmaz tələb xarakteri alır. Təlimlərlə yanaşı, yeni tədris ilindən ADU-da ilk dəfə həm bu təhsil ocağının, həm də digər universitetlərin tələbələri üçün magistratura hazırlığına başlayırıq.

Nəzərinizə bir məsələni də çatdırım ki, Dil və Tərcümə Xidmətləri Mərkəzində sosial layihələr də təşkil olunur, belə ki planlaşdırılan layihələrdən biri də, Universitetdə, təhsil alan və maddi imkani zəif olan tələbələrin əlavə dil biliklərinin inkişaf etdirilməsinə eyni zamanda, digər hazırlıqlara qatılmasına təmənnasız yardım ediləcək.

 “Sonda bütün müəllimlərə, tələbələrə müraciət edərək bildirmək istərdim ki, biliklərinizi daha da artırmaq istəyirsinizsə, Azərbaycan Dillər Universitetinin Dil və Tərcümə Xidmətləri Mərkəzi sizə gözəl imkanlar təklif edir. Bunun üçün çox əlverişli şərait mövcuddur və mərkəz müasir təhsil və tədris standartlarına uyğundur. Bu imkanlardan maksimum yararlanın”.

 

ADU -nun Dil və Tərcümə Xidmətləri mərkəzinin direktor müavini

Elçin Hüseynov