Mayın 16 - da Azərbaycan Dillər Universitetinin (ADU)  Dil və Tərcümə Xidmətləri Mərkəzi tərcümə sahəsində nəzərdə tutulan silsilə təlimlər çərçivəsində növbəti "Diplomatik tərcümə və şifahi tərcümədə protokol qaydaları" haqqında seminar keçirib. Seminarı ADU-nun Beynəlxalq əlaqələr şöbəsinin müdiri vəzifəsini icra edən filologiya elmləri namizədi, fövqəladə və səlahiyyətli səfir Tofiq Abdullayev və ADU-nun Dil və Tərcümə Xidmətləri Mərkəzinin direktoru Fialə Abdullayeva aparıb.

Seminarda iştirakçılar ilk növbədə peşəkar sahədə biliklərini artırmaqla yanaşı diplomatik sahədə tərcümənin özünəməxsus tələbləri və şərtləri haqqında həm nəzəri, həm də təlimçinin peşəkar iş təcrübəsindən irəli gələn praktik məlumatlarla tanış olublar. Seminarda eyni zamanda diplomatik ünsiyyət prosesində tərcüməçidən tələb olunan davranış qaydaları və etiket normaları da müzakirə edilib. Sonda iştirakçılara ADU-nun rəsmi sertifikatı verilib.