Aprelin 4-də Azərbaycan Dillər Universitetində (ADU) Azərbaycanşünaslıq Elmi Tədqiqat Laboratoriyası (ETL) və Tərcümə fakültəsinin təşkilatçılığı ilə Azərbaycan xalqının çoxəsrlik ənənələrə malik bədii və fəlsəfi fikrində dərin iz qoymuş mütəfəkkir şair İmadəddin Nəsiminin  650 illik  yubileyinə həsr olunmuş dəyirmi masa keçirilib.

Tərcümə fakültəsinin dekanı dosent Bənövşə Məmmədova diqqətə çatdırıb ki, Nəsimi  Azərbaycan xalqının dünya mədəniyyətinə bəxş etdiyi qüdrətli söz ustalarındandır. Nəsimi irsinin Azərbaycan xalqının mənəviyyat xəzinəsində layiqli yerini tutmasından söz açan dekan ölməz şairin  yaradıcılığına məhz ulu öndər Heydər Əliyevin verdiyi yüksək dəyərdən danışıb.

Nəsimi adına Dilçilik İnstitutunun direktoru, akademik Möhsün Nağısoylu Nəsiminin Azərbaycan ədəbiyyatında tutduğu mövqedən, bu böyük söz sahibinin zəngin ədəbi irsindən danışıb, Nəsiminin dillər əzbəri olan “Sığmazam” qəzəlini təhlil edib.

Filologiya elmləri doktoru, professor, Azərbaycan Yazıçılar Birliyinin üzvü Adil Babayev və Azərbaycan Dillər Universiteti Həmkarlar Təşkilatının sədri Misgər Məmmədov Nəsimi yaradıcılığı haqqında  fikirlərini  söyləyiblər.