Bu günlərdə ali təhsil sahəsində təqaüd sisteminin təkmilləşdirilməsinə dair Prezident İlham Əliyevin müvafiq Sərəncamları ilə bakalavriatura, magistratura və doktoranturada təhsil alan insanların ailə şəraitini, ümumi güzəranını yaxşılaşdırmaq istiqamətində çox ciddi və mühüm addımlar atılıb.

Azərbaycan Prezidentinin sərəncamları ziyalılar, ictimaiyyət nümayəndələri, təhsil işçiləri, xüsusilə də tələbələr arasında çox böyük sevinc və minnətdarlıqla qarşılanıb. Mətbuatda dərc olunan yazılarda ziyalılar tələbə və doktorantların təqaüdlərinin artırılması ilə bağlı Sərəncamları təkcə humanitar müstəvidə deyil, eyni zamanda, ictimai-siyasi müstəvidə də son dərəcə böyük rezonans doğuran, son dərəcə dəyərli qərar adlandırıblar. Azərbaycan Dillər Universitetinin Beynəlxalq münasibətlər və idarəetmə fakültəsinin III kurs tələbəsi Şahin Sərdarlı da Azərbaycan Prezidentinə tələbələr adından minnətdarlıq məktubu ünvanlayıb. Tələbəmizin məktubu Azərbaycan Respublikası Prezidentinin Rəsmi internet səhifəsində (president.az) dərc olunub: "Hörmətli cənab Prezident.

Siz tələbələrə olan diqqət və qayğınızı dəfələrlə nümayiş etdirmisiniz. Bu, bizi sevindirir, ruhlandırır, ilhamlandırır. Tələbələrin təqaüdləri ilə bağlı imzaladığınız sərəncamlar hər bir tələbənin, hər bir ailənin sevincinə səbəb olub.

Azərbaycan xalqının rifahının yüksəlməsinə, gənclərin karyeralarının uğurlu inkişafına yönələn addımlarınız Sizin müdrik siyasətinizi təcəssüm etdirir. Siz hər bir Azərbaycan vətəndaşının yanındasınız, yanında olmusunuz və olacaqsınız. Buna tam səmimiyyətimlə inanıram. Sevincimiz böyükdür. Biz tələbələrə olan diqqətiniz Azərbaycanın sabahı, gələcəyi olan gənclərin daha da sağlam mühitdə formalaşmasına, inkişaf etməsinə inamımızı daha da artırır.

Möhtərəm cənab Prezident, Sizin sayənizdə Azərbaycan bu gün daha da uğurla inkişaf edir. Cənab Prezident, bütün tələbələr adından Sizə minnətdarlığımızı bildiririk. Yaxşı ki, varsınız, nə yaxşı ki, bizimləsiniz. Hörmətlə, Sərdarlı Şahin Rövşən oğlu. Azərbaycan Respublikası, Bakı şəhəri". https://president.az/articles/31888