Azərbaycan Dillər Universitetində (ADU) Birləşmiş Millətlər Təşkilatının (BMT) İctimai İnformasiya Departamentinin təşəbbüsü ilə BMT-nin rəsmi dillərini təbliğ etmək məqsədi ilə 2010-cu ildə təsis edilən “Çin dili günü”nə həsr olunmuş açıq dərs keçirilib.

Tədbirdə Çin dilində dərslik və lüğətlər, həmçinin Azərbaycan-Çin əlaqələrinin inkişafı istiqamətində Ümummilli lider Heydər Əliyev və Prezident İlham Əliyevin gördüyü işlər haqqında çin dilində yazılmış kitabların sərgisi keçirilib.

ADU-nun Konfutsi İnstitutunun direktoru professor Rafiq Abbasov əsası Ümummilli lider Heydər Əliyevin Çinə tarixi səfəri zamanı qoyulmuş Çin ilə Azərbaycan arasında təhsil sahəsində sürətlə genişlənən əməkdaşlıqdan söz açıb. Professor Azərbaycan gənclərinin Çin dili və mədəniyyətinə marağının artdığını qeyd edib. Bildirib ki, ölkəmizdə Çin dili üzrə rəsmi sınaq mərkəzi sayılan, ADU nəzdində fəaliyyət göstərən Konfutsi İnstitutunda ilk dəfə bu dillə bağlı Hanyu Shuiping Kaoshi (HSK) və Hanyu Shuiping Kouyu Kaoshi (HSKK) imtahanları keçirilib.

Konfutsi İnstitutunun müəllimi Çen Siaocen Çin dilinin tarixi, ADU-da Çin dilinin tədrisinin metodik xüsusiyyətləri və perspektivləri haqqında məlumat verib.

Sonda tədbir iştirakçıların sualları cavablandırılıb.