Martın 13-də Azərbaycan Dillər Universitetinin rektoru, AMEA-nın həqiqi üzvü, əməkdar elm xadimi Kamal Abdulla Macarıstanın Azərbaycandakı fövqəladə və səlahiyyətli səfiri Viktor Sederkenyi ilə görüşüb.

Qonağı salamlayan rektor Kamal Abdulla Azərbaycan-Macarıstan münasibətlərinin yüksək səviyyədə olduğunu deyib, hər iki ölkənin ali təhsil müəssisələrinin bu münasibətlərin inkişafına yeni töhfələr verə biləcəyini vurğulayıb.

Kamal Abdulla ADU-nun Beynəlxalq münasibətlər və idarəetmə fakültəsində macar dilinin tədris edildiyini bildirib, bunun davamlı olması üçün birgə səylərin vacibliyindən danışıb.

Akademik “Səfir saatı” layihəsindən söz açıb və səfir Viktor Sederkenyini layihə çərçivəsində ADU tələbələrinə mühazirə deməyə dəvət edib.

ADU-da fəaliyyət göstərən mərkəzlər barədə məlumat verən rektor ADU-da Macarıstan mərkəzinin yaradılması təklifi ilə çıxış edib. Vurğulayıb ki, Macarıstan universitetlərindən birində də Azərbaycan Dili və Mədəniyyəti Mərkəzinin yaranması məqsədəuyğun olardı.

Macarsıtan universitetləri ilə əlaqənin vacibliyindən danışan Kamal Abdulla Viktor Sederkenyinin bu istiqamətdə mühüm addımlar ata biləcəyinə inamını ifadə edib.

Akademik Kamal Abdulla 4-5 may 2018-ci il tarixlərində Azərbaycan Dillər Universiteti, Yeni Azərbaycan Partiyası və Bakı Beynəlxalq Multikulturalizm Mərkəzinin birgə təşkilatçılığı ilə Ümummilli lider Heydər Əliyevin anadan olmasının 95-ci ildönümünə həsr olunmuş “Heydər Əliyev: multikulturalizm və tolerantlıq ideologiyası” I Beynəlxalq elmi konfransı haqqında danışıb və dünyanın müxtəlif ölkələrində yerləşən universitetlərdə bölmə iclaslarının keçiriləcəyini bildirib. O, Macarıstan universitetlərindən birininin də bu prosesdə iştirak edə biləcəyini diqqətə çatdırıb.

Yüksək qonaqpərvərliyə görə universitet rəhbərliyinə öz təşəkkürünü bildirən səfir Viktor Sederkenyi səslənən təklifləri müsbət qarşıladığını bildirib. Səfir ADU-da Macarıstan Mərkəzinin, Macarıstanda isə Azərbaycan Dili və Mədəniyyəti Mərkəzinin yaradılması istiqamətində konkret addımlar atmağın vacibliyini vurğulayıb.