XƏBƏRLƏR

ADU-nun tələbəsindən erməni professora layiqli cavab

30 mart, 2017
Fatimə Şirəliyeva: “Məqsədim kimisə işsiz qoymaq və düşmənçilik aparmaq deyildi, ancaq müəllimə yaraşmayan bu münasibət onun lazımi cəzanı alması ilə nəticələndi” Azərbaycan Dillər Universitetinin (ADU) Pedaqoji (ingilis dili və fransız dili üzrə) fakültəsinin tələbəsi olan Fatimə Şirəliyeva təhsil aldığı 2012-2016-cı illər ərzində həm dərslərində, həm də universitetin ictimai həyatında aktivlik göstərən tələbələrdən olub. O, ADU-da təhsil alarkən tələbə mübadiləsi proqramı haqqında məlumat əldə edib. Həmin proqramda iştirak etmək huququ qazanan F.Şirəliyeva xaricdə təhsil almaq, biliklərini təkmilləşdirmək məqsədi ilə 2014-2015-ci tədris ilində təhsilini Polşanın Lodz Universitetində davam etdirib. Amma F.Şirəliyeva Polşadakı tələbəlik həyatında xoşagəlməz hadisə ilə qarşılaşıb. Belə ki, Lodz Universitetinin erməni professoru Krakovyan düşmənçilik mövqeyindən çıxış edərək azərbaycanlı olduğu və Dağlıq Qarabağ mövzusuna müraciət etdiyi üçün F.Şirəliyevanı qəsdən imtahandan kəsib. Müəllim-tələbə münasibətlərinin düşmənçilik üzərində qurulmasının yolverilməz olduğunu bildirən F.Şirəliyeva professordan bu yanaşmanı gözləmədiyini söyləyib: “Əslində Krakovyan bizim fənn müəllimimiz deyildi. Öz müəllimimiz məzuniyyətdə olduğundan bizim dərslərimizi tədris etmək ona tapşırılmışdı. O, mənim azərbaycanlı olduğumu bildiyi andan etibarən mənə qarşı aqressivlik nümayiş etdirir, məni digərlərindən seçir, düşmən münasibəti bəsləyirdi. Hətta Krakovyan telefonumu stolun üstünə qoyduğuma görə mənə irad tutdu və düşmən mövqedən çıxış edərək mənə dedi ki, siz azərbaycanlılar şöhrətpərəstliyi o qədər çox sevirsiniz ki, telefonunu nümayiş etdirirsən. Təbii ki, onun bu sözlərini cavabsız qoymadım.  Bütün bunları gördükdən sonra bu haqda anama dedim. Anam valideyn narahatlığı ilə hətta təhsilimi yarımçıq qoyub geri qayıtmağımı məsləhət gördü. Amma mən haqqımı tələb edərək uğur qazanacağımı bilirdim. Mən ilk Avropa Oyunlarında iştirak etmişəm. Biz ölkəmizdəki idman yarışlarına qatılan erməni nümayəndələrinə həmişə yaxşı münasibət bəsləmişik. Öz növbəmdə mən də müəllimimdən həmin münasibəti gözləyirdim, amma bunun əksini gördüm. Dərslərdə iştirak etdikcə onun mənə qarşı digərlərindən fərqli və aqressiv reaksiyalarını hiss edirdim. Bu münasibəti gördükcə mən də imtahan üçün seçdiyim mövzunu dəyişərək Dağlıq Qarabağla bağlı mövzu ilə əvəzlədim. Dağlıq Qarabağ haqqında danışanda türk tələbələr məni alqışladılar. O, mənim sözümü kəsdi və qiymətimi özümə deyəcəyini bildirdi. İmtahan cavabları bəlli olanda nəticəmin qənaətbəxş olmadığını gördüm və bununla bağlı universitetin dekanlığına müraciət etdim. Dekanlıqdan mənə həmin müəllimin 15 illik fəaliyyətində hər hansı haqsızlığa yol vermədiyini bildirdilər. Mən bununla kifayətlənmədim, universitetin rektoruna və digər qurumlara müraciət etdim. Onlar məni dinləyərək haqlı olduğumu bildilər və layiq olduğum qiyməti mənim imtahan nəticəmə əlavə etdilər. Bununla yanaşı, ali təhsil müəssisəsinin rəhbərliyi həmin müəllimi universitetdən kənarlaşdırdı. Məqsədim kimisə işsiz qoymaq və düşmənçilik aparmaq deyildi, ancaq müəllimə yaraşmayan bu münasibət onun lazımi cəzanı alması ilə nəticələndi” Tarixə nəzər yetirsək, ermənilərin daima azərbaycanlılara qarşı xəbis münasibətinin şahidi olarıq. Hər vəchlə xalqımıza xainlik edən bu millətin nümayəndələri fitnəkar əməllərindən çəkinmək bilmirlər. F.Şirəliyeva ilə erməni tələbə arasında yaşanan hadisə buna bariz nümunə ola bilər. Tələbəmiz bildirir ki, yaşadığı yataqxananın qeydiyyat bölməsində müxtəlif ölkələrin bayraqları yerləşdirilib. F.Şirəliyeva erməni tələbə tərəfindən Azərbaycan və Ermənistan bayraqlarının yanaşı qoyulduğunu görüb. Bununla bağlı iradını bildirən F.Şirəliyevaya erməni tələbə bunu məhz ona əsəb vermək üçün etdiyini söyləyib. F.Şirəliyeva Polşada tələbə olarkən Azərbaycan diasporu ilə bərabər bir çox tədbirlər keçirdiklərini qeyd edib. Xocalı soyqırımı ilə bağlı təşkil olunan paradda yaxından iştirak edən F.Şirəliyeva Azərbaycan həqiqətlərinin dünyaya çatdırılması işində kiçik də olsa rol oynamasının onun üçün sevindirici hal olduğunu vurğulayıb.