İyunun 19-da Yunanıstanın Azərbaycandakı fövqəladə və səlahiyyətli səfiri Maria Papakonstantinu ADU-nun qonağı olub. Rektor akademik Kamal Abdulla səfiri universitetdə görməkdən məmnun olduğunu bildirib.

Görüş zamanı Kamal Abdulla Azərbaycanla Yunanıstan arasında mövcud olan dostluq münasibətlərindən danışıb, təhsil və mədəniyyət sahələrində əməkdaşlığın əhəmiyyətini vurğulayıb.

Rektor ADU-da xarici dillərin tədrisi istiqamətində həyata keçirilən layihələr barədə məlumat verərək, universitetin beynəlxalq əlaqələrinin genişləndirilməsinə xüsusi önəm verdiyini qeyd edib.

ADU-da fəaliyyət göstərən Yunan dili və mədəniyyəti mərkəzinin iki ölkə arasında elmi-mədəni əlaqələrin inkişafına mühüm töhfə verdiyi qeyd olunub. Bildirilib ki, mərkəz tələbələrin yunan dili, tarixi və mədəniyyəti ilə daha yaxından tanış olmasına geniş imkanlar yaradır.

Görüşdə mərkəzin fəaliyyətinin daha da genişləndirilməsi və bu istiqamətdə yeni əməkdaşlıq layihələrinin həyata keçirilməsi məsələləri də müzakirə olunub.

Səmimi qarşılanmaya və xoş sözlərə görə təşəkkürünü bildirən səfir Maria Papakonstantinu ADU ilə əlaqələrin gələcək imkanlarından söz açıb. Səfir universitetin beynəlxalq əməkdaşlıq sahəsində əldə etdiyi uğurları yüksək qiymətləndirərək, təhsil və mədəniyyət istiqamətlərində əlaqələrin daha da inkişaf etdirilməsinin vacibliyini vurğulayıb.

Söhbət zamanı gələcəkdə birgə tədbirlərin, akademik mübadilə proqramlarının və elmi layihələrin həyata keçirilməsi məsələləri müzakirə olunub. Qeyd olunub ki, tələbə və müəllim mübadiləsi proqramları, birgə elmi tədqiqatlar və mədəni layihələr iki ölkənin ali təhsil müəssisələri arasında əlaqələrin möhkəmlənməsinə xidmət edəcək.

Görüş qarşılıqlı elmi və mədəni əməkdaşlıqla bağlı müzakirələrlə davam edib.