Azərbaycan Dillər Universitetinin (ADU) Beynəlxalq əlaqələr üzrə prorektoru dosent Jalə Qəribova, Linqvokulturologiya kafedrasının müdiri, Daxili Keyfiyyət Təminatı Komissiyasının sədri dosent Vüsalə Ağabəyli, Beynəlxalq şöbənin müdiri Röya Əliyeva, Keyfiyyətin Təminatı və Monitorinq şöbəsinin müdiri fil.f.d Fatma Qurbanzadə QS Beynəlxalq Reytinq Agentliyinin iştirakı ilə ali təhsil müəssisələrinin nümayəndələri üçün təşkil olunan təlimdə iştirak ediblər. 

 

Sözügedən təlim sentyabrın 18-19-da Elm və Ali Təhsil üzrə Dövlət Agentliyinin təşkilatçılığı və QS Beynəlxalq Reytinq Agentliyinin regional direktoru Sergey Xristolyubovun iştirakı ilə ali təhsil müəssisələrinin beynəlxalq reytinqlər üzrə məsul şəxsləri arasında keçirilib.

 

Təlimdə açılış nitqi ilə çıxış edən Elm və Ali Təhsil üzrə Dövlət Agentliyinin direktoru Ülkər Səttarova əsas hədəfin yerli universitetlərin beynəlxalq reytinqlərdəki mövqeləri deyil, müəssisələrin daxilində təhsil və elmi proseslərinin əks etdirməsi olduğunu qeyd edib. Eyni zamanda o, beynəlxalq reytinqlərdə iştirakın ali təhsil müəssisələrinin beynəlxalq nüfuzunun artırılması üçün yaratdığı imkanların və qarşıda duran hədəflərə nail olmaq üçün ali təhsil müəssisələri arasında əməkdaşlığın əhəmiyyətini vurğulayıb. Direktor həmçinin, qeyd edib ki, ali təhsil müəssisələrinin siyasətinin və uzunmüddətli strategiyasının müəyyənləşdirilməsi üçün beynəlxalq reytinqlərdə iştirak nəticəsində üzə çıxan  təhlillər vacib amillərdən biridir. 

 

QS Agentliyinin regional direktoru Sergey Xristolyubov “Ali təhsil müəssisələrinin qlobal rəqabətə davamlılığının artırılmasında reytinqlərin rolu” mövzusunda təqdimatla çıxış edib və Azərbaycan üzrə təhlil məlumatlarlarına əsaslanan hesabatları təqdim edib.

Görüş çərçivəsində reytinq göstəriciləri üzrə mövqelərin yaxşılaşdırılması üçün yaradılan imkanlar və prosesdə yaranan çətinliklər barədə geniş müzakirələr aparılıb.

 

Sonda ADU əməkdaşları sertifikatla təmin olunublar.