Azərbaycan Dillər Universitetinin Pedaqogika kafedrasının müdiri dosent Nigar Zeynalova Çeçenistan Dövlət Pedaqoji Universitetində işgüzar səfərdə olub.

Səfərin məqsədi tərəfdaş ali məktəblərin (Çeçenistan Dövlət Pedaqoji Universiteti və Azərbaycan Dillər Universiteti) “Rusiya və Azərbaycan təhsil məkanında gələcək müəllimlərin inklüziv mədəniyyətinin formalaşdırılmasının pedaqoji strategiyaları” layihəsinin reallaşdırılması çərçivəsində əlverişli əməkdaşlıq məsələlərinin müzakirəsi idi. 

ADU-nun Pedaqogika kafedrasının müdiri, İnklüziv Təhsil Mərkəzinin rəhbəri dos.N.Zeynalova Çeçenistan Dövlət Pedaqoji Universitetində inklüziv təhsil mühitində tələbələrin praktik pedaqoji fəaliyyətə hazırlığının təşkili prosesi ilə tanış olub. O, ölkəmizdə, xüsusilə,  ADU-da bu istiqamətdə həyata keçirilən tədbirlər barədə geniş məlumat verib. 

Dos.N.Zeynalova ÇDPU-nun Elm və beynəlxalq məsələlər üzrə prorektoru Tamara Avtayeva ilə görüşü zamanı Rusiya və Azərbaycanda pedaqoji ixtisaslar üzrə təhsil alan tələbələrdə inklüziv mədəniyyətin və inklüziv təhsil şəraitində peşə hazırlığının formalaşdırılmasının elmi əsaslarının hazırlanması, ali məktəblər arasında “Ali pedaqoji təhsil ekosistemində uğurlu inklüziv təcrübələr” adlı elmi-tədris laboratoriyasının yaradılması perspektivlərini müzakirə ediblər.

Səfər zamanı ÇDPU və ADU-nun pedaqoji ixtsaslar üzrə təhsil alan tələbələrinin akademik mobilliyi çərçivəsində silsilə maarifləndirici tədbirləri (elmi və tədris seminarları, praktikumlar, təlimlər, inklüziv könüllü və tədqiqat layihələri) əhatə edən “Gələcək pedaqoqların inklüziv kompetensiyalarının formalaşdırılması” proqramının həyata keçirilməsinə dair razılaşma əldə olunub.

Görüşdə sağlamlıq imkanları məhdud şəxslərin korreksiyası, reabilitasiyası, cəmiyyətə inteqrasiyası sahəsində kadr hazırlığı məqsədilə ikili diplomlu beynəlxalq magistr proqramının açılması məsələləri də müzakirə edilib. 24 iyunun-15 iyul tarixlərində ÇDPU-da keçirilmiş “Yay pedaqoji emalatxanası”nda da bu istiqamətdə dəyirmi masalar keçirilib, dinləyicilərin həmin sahəyə xüsusi maraq göstərməsi diqqəti cəlb edib.

Dos.N.Zeynalova Çeçenistan Respublikasında xüsusi təhsil ehtiyacları olan uşaqların korreksiyası, reabilitasiyası məqsədilə fəaliyyət göstərən İ.S.Taramov adına “Sağlamlıq imkanları məhdud uşaq və yeniyetmələr üçün respublika reabilitasiya mərkəzi” və Qroznı şəhərində fəaliyyət göstərən “Uşaqların müalicəsi və reabilitasiyası mərkəzi”ndə olub.

Dos.Nigar Zeynalovanın Çeçenistan Respublikasının Təhsil və Elm nazirinin müavini Əhməd Usmanovla görüşündə inklüziv təhsilin problemləri və gələcək əməkdaşlığın perspektivləri, pedaqoji kadr hazırlığı sahəsində əməkdaşlıq əlaqələri müzakirə edilib.