İnformasiya Departamenti

719

İnformasiya Departamenti ADU-nun Elmi Şurasının 26 oktyabr 2016-cı il tarixli iclasında qəbul olunan qərara əsasən yaradılıb. Bu tarixə kimi isə İctimaiyyətlə əlaqələr Departamenti kimi fəaliyyət göstərib.

24 fevral 2014-cü il tarixli 15 saylı əmrə əsasən yaradılmış İctimaiyyətlə əlaqələr Departamenti İctimaiyyətlə Əlaqə və Mətbuat xidməti şöbəsinin bazasında fəaliyyətə başlayıb. ADU-nun İctimaiyyətlə Əlaqə və Mətbuat xidməti şöbəsi 2008-ci ilin dekabrından fəaliyyət göstərsə də, şöbənin yaradılması haqqında rəsmi qərar 2009-cu ilin fevral ayının 4-də verilib.

Departament öz işini bir neçə istiqamətdə qurub. Departamentin tərkibinə İctimaiyyətlə əlaqələr şöbəsi, “Poliqlot” qəzeti redaksiyası, Protokol xidməti və TV studiya daxildir.

KİV-lə əlaqə, press-relizlərin hazırlanması, ictimaiyyətin universitetin fəaliyyəti haqqında məlumatlandırılması və universitetin nüfuzunun daha da yüksəlməsi və müsbət rəy formalaşdırmaq üçün universitetin təbliği departamentin üzərinə düşən əsas vəzifələrdir. Bundan başqa, ADU-nun rəsmi mətbu orqanı olan “Poliqlot” qəzetinin nəşri, həmçinin universitetin www.adu.edu.az internet saytı ilə iş də İnformasiya Departamentinin fəaliyyətinə aiddir. Protokol xidməti isə universitetdə keçirilən tədbirlərin təşkilinə nəzarət edir.

Protokol xidməti İnformasiya Departamentinin tərkibində bölmə olaraq 2010-cu ilin mart ayından fəaliyyət göstərir.

8 səhifəlik “Poliqlot” qəzeti 2000-ci ilin dekabr ayından etibarən nəşr olunur. Universitetin professor və tələbələri öz məqalələrini bu qəzetdə dərc etdirirlər. Eyni zamanda “Poliqlot” qəzeti universitetin məzunları ilə yaxından əməkdaşlıq edir. Əvvəllər ayda iki dəfə nəşr olunan qəzet hazırda ayda bir dəfə çap olunur.

Ölkənin ali təhsil müəssisələri arasında ilk dəfə olaraq məhz ADU-nun İctimaiyyətlə əlaqə və Mətbuat xidməti şöbəsi 2009-cu il iyulun 7-də KİV nümayəndələri üçün 2008-2009-cu tədris ilinin yekunlarına həsr olunmuş brifinq təşkil edib.

2010-cu ildə Azərbaycan Dillər Universiteti “İlin Universiteti”, ADU-nun Mətbuat xidməti isə ali təhsil müəssisələrinin müvafiq strukturları içərisində birinci yerə çıxaraq “İlin mətbuat xidməti” adını qazanıb. 2011-ci ildə isə ADU-nun Mətbuat xidmətinin rəhbəri ali təhsil müəssisələri üzrə “İlin mətbuat katibi” seçilib.

Universitetlər içərisində ilk dəfə məhz ADU-nun rəsmi mətbu orqanı olan “Poliqlot” qəzeti 22 oktyabr 2009-cu ildə Azərbaycan Mətbuat Şuraşına üzv qəbul olunub.

Departament tərəfindən 2015-2016-cı tədris ilinin payız imtahan sessiyasının mövcud qaydalara uyğun təşkili, tələbələrin biliyinin qiymətləndirilməsində şəffaflığın, obyektivliyin və qərəzsizliyin təmin edilməsi məqsədi ilə fakültələrdə Korrupsiyaya Qarşı Mübarizə üzrə QHT, təhsil ekspertləri və ölkə KİV-nin iştirakı ilə iki dəfə mediatur təşkil edilib, ictimai iştirakçılığı gücləndirmək məqsədi ilə sosioloji sorğu keçirilib.

Departament eyni zamanda, ADU-nun “Azərbaycan Dillər Universiteti-Rəsmi səhifə” adlı rəsmi Feysbuk səhifəsini idarə edir və universitetin fəaliyyəti barədə KİV-də yayımlanan xəbərləri, videosüjetləri və fotoşəkilləri səhifəyə yerləşdirir. Eyni zamanda Təhsil Nazirliyinin Feysbuk səhifəsi olan “Ali təhsil müəssisələri”ndə də universitet haqqında məlumat və fotoşəkillər,  o cümlədən ADU-nun TV studiyasının hazırladığı xəbərlər (açıq dərslər, görüşlər və s.) yerləşdirilir.

ADU-nun TV studiyası 2015-ci ilin sentyabr ayından Azərbaycan Dillər Universitetində İnformasiya Resurs Kompleksinin nəzdində fəaliyyət göstərməyə başlayıb. TV studiyanın yaradıcı heyəti xəbər blokları, qısa müsahibələr, müxtəlif telelayihələr hazırlayır, ADU-nun müəllim və tələbə heyətinin fəaliyyətini əks etdirən maraqlı süjetlər, verilişlər üzərində işləyir. TV-də universitet  müəllimlərinin elmi yaradıcılığı  ilə bağlı maraqlı süjetlər, gənclər arasında keçirilmiş  müxtəlif  video sorğular nümayiş olunur. TV studiya həmçinin ADU-ya gələn  xarici  qonaqlarla da müsahibələr  hazırlayır.

Paylaş